Karolina Zofia Milowska BCMaterialseko ikertzaile berria

BCMaterialsek ongietorria eman dio Karolina Zofia Milowskari, zentroan Ikerbasque Research Fellow eta Ramón y Cajal Fellow ikertzaile gisa hasi baita. Zientzia Fisikoetan doktorea da Varsoviako Unibertsitatean, eta nazioarteko ibilbide sendoa egin du Municheko Ludwig Maximilian Unibertsitatean, Cambridgeko Unibertsitatean eta CIC nanoGUNEn, besteak beste. Haren ibilbideak hainbat aitortza jaso ditu; tartean, Estatuko Ikerketa Agentziaren R3 ziurtagiria eta Euskal Herriko Unibertsitatearen Venia Docendi gaikuntza.

Milowskaren ikerketa materia kondentsatuaren fisikan, kimika kuantikoan eta materialen zientzia konputazionalean oinarritzen da. Eskala anitzeko modelizazio-teknika aurreratuen bidez, karbonozko nanohodien, bi dimentsioko materialen, perovskita hibridoen eta material konposatuen propietate mekanikoak, optoelektronikoak eta garraio-propietateak aztertzen ditu.

BCMaterialsen, ezagutza hori energia jasangarrirako, nanoelektronikarako eta espazioarekin lotutako aplikazioetarako irtenbide berriak garatzera bideratuko du. Milowskak gure zentruko materialen Zientzia konputazionalaren taldean lan egingo du.