Jon Pascual eta Pablo Muñumer, ikertzaile berriak BCMaterials-en

Aste honetan, Jon Pascual eta Pablo Muñumer doktoratu ondoko eta doktoratu aurreko ikertzaile berriak gisa, hurrenez hurren, BCMaterialen sartu dira.

Jon Pascualek Roberto Fernández de Luisekin, BCMaterials-eko Research Fellow-ekin, lan egingo du konposatu metal-organikoak (MOF) aplikatzen, minbizi gastrointestinalaren aurkako farmakoak modu kontrolatuan askatzeko. Minbizi gastrointestinala da gaixotasun-mota horretan bigarren ohikoena. UPV/EHUn Kimikan graduatua, 2017an Material Berrien Masterra egin zuen, unibertsitate horrek Kantabriako Unibertsitatearekin lankidetzan egiten duena. Ondoren, Materialen Zientzia eta Teknologiako doktoregoa egin zuen UPV/EHUn. Doktoregoa lortu zuen nazioarteko aipamen batekin, eta horri esker ikerketa-egonaldi bat egin zuen Saudi Arabiako KAUST Unibertsitatean (King Abdullah University of Science and Technology).

Bestalde, Pablo Muñumer doktoratu aurreko ikertzaileak material bigun elektroaktiboen fabrikazioaren esparruan lan egingo du. Karakterizazio-teknika aurreratuen bidez, material hauen  ulermena hobettzen lagunduko du bere lanak. Muñumer Kimikan graduatua da UPV/EHUn, eta Material Berrien Masterra lortu zuen unibertsitate berean. Ikerketa-esperientzia du CIC nanoGUNEn, POLYMATen eta UPV/EHUko Donostiako Kimika Fakultatean, proteina-polimero hibridoak eta horietatik eratorritako nanomaterialak garatuz.

Ongi etorri, Jon eta Pablo!