"BeZientzia": 200 ikasle zientzialari bihurtu dira egun batez

Urriaren 28an eta 29an "BeZientzia" azoka zientifikoa egin zen Bilbon. Bertan, Bizkaiko ikastetxeetatik etorritako Lehen Hezkuntzako 6. mailako 200 ikasle inguruk parte hartu zuten. BCMaterials lau erakunde antolatzaileetako bat izan zen Achucarro – Basque Center for Neuroscience, BC3 – Basque Center for the Climate Change eta BCAM – Basque Center for Applied Mathematics erakundeekin batera, guztiak ere Bizkaiko BERC (Basque Excellence Research Centers) sarekoak.

"BeZientzia" tailerren formatuan garatu zen, ikasleak zientzialari bihurtuz egun batez. Bertaratutakoek modu zientifikoan ikasi zituzten kontzeptu matematikoak, haien karbono-aztarna kalkulatzen eta Bizkaiko ekosistemak identifikatzen, elikagaien genetika aurkitzen eta, BCMaterialsen kasuan, material berriek urak deskontaminatu eta balorizatzea nola ahalbidetzen duten ezagutzen.

Martxan dauden MOFak

Gure zentroko ikertzaileek konposatu metal-organikoek (metal organiko-frameworkak edo MOFak) nola funtzionatzen duten azaldu zuten. Beren egitura porotsuaren eta ezaugarri kimikoen bidez, MOFek uraren elementu kutsatzaileak harrapatzen dituzte, hala nola metal astunak edo PFASak, eta elementu baliotsuak berreskuratzeko aukera ere ematen dute, ondoren industrian erabiltzeko, hala nola urrea, litioa, kobaltoa eta abar.

Jardueraren emaitza oso ona izan zen bai antolatzaileentzat bai parte-hartzaileentzat. Helburua Zientziarekiko jakin-mina eta ikasleengan ikasteko zaletasuna piztea zen, hurrengo urrats akademikoak heltzen hasten diren fasean. Pedagogiaren eta psikologiaren arloko hainbat azterlanen gomendioei jarraituz, garrantzitsua da 11-12 urteko ikasleengan eragina izatea, zientzia aukera bideragarria eta erakargarria izan dadin haientzat.