Sei ikerketa-proiektu berri Elkartek 2026 programan

BCMaterialsek Eusko Jaurlaritzak finantzatutako Elkartek 2026 programaren barruan onartutako sei proiektu berritan parte hartuko du. Proiektuek zentroaren lau ikerketa-arlo nagusiak hartzen dituzte: ingurumenerako materialak, osasunarekin lotutako materialak, energia sortzeko eta biltegiratzeko materialak eta teknologia digitaletarako materialak. Jarraian, proiektu bakoitzaren ezaugarri nagusiak laburbilduko ditugu.

CICe2026: egoera solidoko bateriak

Proiektuaren helburu nagusia egoera solidoko bateria hibridoen belaunaldi berri bat ikertzea eta garatzea da. Horretarako, material zeramiko eta polimeriko aurreratuak konbinatuko dira elektrolitoan. Bateria horiek energia modu egonkorrean biltegiratzeko erabiliko dira, gaitasun handiko sare elektrikoei malgutasun handiagoa emateko eta industria-prozesuen elektrifikazioa bultzatzeko.

CO2PTURE: CO₂-a atzitu eta balioztatzea

Proiektuaren helburua industria-sektore estrategikoen deskarbonizazioan laguntzea da, hala nola siderurgian eta industria kimikoan. Horretarako, karbonoa atzitzeko, erabiltzeko eta biltegiratzeko teknologiak garatuko dira, CCUS izenez ezagutzen direnak. Teknologia horien bidez, industria-isurietako CO₂-a atzitu eta industria-estalduretan erabil daitezkeen material jasangarri bihurtu nahi da.

ENHARPE2: energia-autonomia duten sentsoreak

ENHARPE proiektuaren jarraipen gisa, ENHARPE2k iturri berriztagarrietatik energia biltzeko eta energia elektriko bihurtzeko sistemak ikertuko ditu. Horrela, energia-kontsumo txikiko gailuek autonomia handiagoa izatea ahalbidetu nahi da. Horretarako, elektronika inprimatua eta osagai funtzionalak erabiliko dira. Proiektuak bost energia-transduktore mota nagusi aztertuko ditu: irrati-maiztasunekoak, eguzki-energiakoak, piezoelektrikoak, triboelektrikoak eta termoelektrikoak. Ikerketak material eraginkorragoak eta jasangarriagoak garatzea izango du ardatz.

GREENCHIP: mikrofluidikarako paradigma berria

GREENCHIP proiektuaren helburua gailu mikrofluidikoen diseinua eta fabrikazioa automatizatzeko eta estandarizatzeko ezagutza eta estrategia berriak garatzea da. Sistema mikrofluidikoen mundu mailako eskari handiak, bereziki osasunaren esparruan, gailu horien ekoizpena sistematizatzeko aukera eskaintzen du. Horri esker, kostuak murriztu, erreproduzigarritasuna eta errendimendu funtzionala hobetu, eta mikrofluidikaren arloko ikerketaren transferentzia industriara eta merkatura bizkortu ahal izango da.

IRAUBAT: bateria zirkularrak eta iraupen luzekoak

IRAUBATek litio-ioizko baterietan erabiltzen diren lehengai kritikoekiko mendekotasuna eta haiei lotutako ingurumen-inpaktua murriztea du helburu. Proiektuak fabrikazio jasangarriko, berrerabilpeneko, birmanufakturako eta birziklatzeko estrategiak ikertuko ditu, baterien osagaien bizitza baliagarria luzatzeko eta materialen zikloa ixteko.

PRISMA2: fotonika adimenduna

Sentsore fotonikoek materialen propietate kimikoak, egiturazkoak eta morfologikoak modu azkarrean, urrutitik eta laginak kaltetu gabe neurtzeko aukera ematen dute. Hala ere, industrian duten erabilera oraindik mugatua da, kostu handiengatik, sendotasun faltagatik, integrazio-zailtasunengatik, etengabe kalibratu behar izateagatik eta baldintza desberdinetan modu fidagarrian jarduteko gai diren adimen artifizialeko ereduen gabeziagatik. PRISMA2k inprimatu daitezkeen sentsore fotoniko multimodalak garatuko ditu, uhin-luzera desberdinetan neurtzeko gai izango direnak. Sentsore horiek materialak aztertzeko erabiliko dira, kostuak murrizteko eta industria-prozesuetan zein diagnostiko-sistemetan integratzea errazteko.

Elkartek programaren lankidetza-izaerari jarraituz, BCMaterialsek Euskadiko Zientzia, Teknologia eta Berrikuntza Sareko hainbat erakunderekin batera garatuko ditu proiektu horiek.

Bazkideen artean daude BCAM eta POLYMAT bezalako BERC zentroak; Tecnalia, Tekniker, Gaiker, CEIT eta Vicomtech bezalako zentro teknologikoak; CIC nanoGUNE eta CIC energiGUNE lankidetzako ikerketa-zentroak; Euskal Herriko Unibertsitatea (EHU), Deustuko Unibertsitatea eta Mondragon Unibertsitatea; eta Aclima bezalako sektore-elkarteak.